يا مدونين يا ولاد ال***. . . . تيييييييت

مش عارف إية الطريقه اللى الناس بتتلكم بيها مع المدونين في برامج التلفزيون خصوصا لما الموضوع يبقى له علاقة بالسياسة و الحريات و المظاهرات و مطالب المعارضة و أخيرا أفلام التعذيب

.
الباشا بتاع الداخلية في برنامج ساعه حرة كل لما يجى يتكلم مع وائل عباس يفضل يقول ميثاق العمل الصحفى و يلعن المودنين و سنينهم و المعارضة و الناس اللى بتكبر المواضيع و قال اية الناس اللى بتنشر و تشنع افلام التعذيب دول ليهم اهداف شخصية و مصالح و بيحبوا يلمعوا نفسهم و كمان عندهم عقد و مدعومين من منظمات مشبوهه.. يا معللللللللللللللللم اية الحلاوة دى عظمه على عظمه يا ست أأأأسف يا باشا

.
و مصمم يحقر من مواقع النت و كان بيقول كلمه مدون كأنها شتيمة دى انا قولت دى بقت شتية جديدة اقول لواحد امشى بعيد يا مدون يابن المدون زى ما بنقول يا كلب يا بن الكلب كده او اى شتيمة تانية ولا ممكن كمان يومين نسمع عن ادارة جدية في وزارة الملابس الداخلية - أقصد وزارة الداخلية - إدارة مكافحه التدوين ذى إدارة مكافحه المخدرات أو الاداب

.
لا و إية كمان الاوسخ من كده الراجل بيشكك في الادله - بصراحه الحته دى جامده مووووت - الناس دى مصممه تنافس افلام هنيدى البيضان الكوميدية مش مالى عينه هوا و الوزارة بتاعته افلام متصورة صوت و صورة

.
و كل لما المذيع يجيب سيرة ان كل حاجة متصورة يا باشا وده اكبر دليل و في اية اكتر من كده يقوله اية النيابة بتحقق و احنا دولة القانون و سياده العدالة على الجميع و انتا بتتكلم في اية ماحدش يفتح بقة و النيابة و القانون هايجيب الحق لكل الناس دى لو كان ليهم حق اساسا

.
الجدع الباشا بتاع الداخلية كان بيتكلم بطريقة المدير اللى كل شغله غلط و لما يقولة موظف صغير صباح الخير يا كبير يقولة اية و كمان صباح الخير انتا مخصوم منك يومين , اهو الباشا ده اسلوبة كده بالظبط كل لما المذيع يجيب سيرة القانون حسه يعلى و يقولة اية ايوة طبعا امال اية ؟ لا ما حدش يتكلم عن القانون و ما تسوؤش سمعه مصر هيا البلد نقصاكوا

.
الناس دى بتستهبل الافلام متصورة صوت و صورة و بيقاوحوا و بيشككوا و كمان بيهاجموا الناس اللى فضحت شغلهم الوسخ

.

خلاصه الكلام يا باشا : الانترنت و مهما عملتم دة المكان الوحيد اللى هتفضلوا فية اقلية سواء سلطة تنفيذية يعنى الداخلية و رجالتها او رجاله الحزب الوثنى اللاديموقراطى و مهما راقبتوا و عملتوا مواقع لتجميل صورتكم كل دة اونطه مالوش لازمه و هاتفضلوا اقلية و كمان مضطهدة ايوة مش هانديلكوا الحق اللى اتحرمنا منه لمده اكتر من 25 سنه و من قدم السبت لقى الحد , واحنا لما صدقنا لما لقينا الفرصة دى علشان نبتدى و ناخد اول خطوة كل خطوة للامام استحاله يقابلها خطوة واحده لورا مش خطويتين تلاتة زى ما بتحلموا

.

.
خلاص فينيتو يا باشا..... مات الحوار

.